拜年最怕問題　神啊！請教我如何答

▲ （相片來源：網上圖片）

農曆新年去親戚家拜年，少不了總有「問答環節」，發晦氣或拒絕回答都是消極及對自身有「殺傷力」的回應，也不妨參考商務出版fb專頁的答案。 文人「上身」，文明地回應！

1.「咁大個了，認唔認得我？今年幾多歲？點解你個樣變咗咁多？」

你好想學董伯伯反問對方：「貴姓呀？陳生。」但現實你是不可以如此答，而這句又是一年一度必問的必答題 。

若張愛玲上身，應該是這樣回應：「如果你認識從前的我，那麼你就會原諒現在的我。」

2. 「有沒有拍拖呀？」

親戚最關心的問題之一。未有拖拍的你大可以用身邊其他親戚仔女來當「擋箭牌」，或者你可以串串地講「我慢慢揀緊」。至於有拖拍的你，輕輕答「有。」來終止這個話題.

「文青版」答案：三毛說過「愛情有如佛家的──不可說，不可說，一說就是錯。」

3. 「 唔帶男／女朋友仔出嚟見吓？幾時結婚？」

若果親戚仔女都出現，當中總有人單身，最好找來當「擋箭牌」，以「論資排輩」作為藉口：「XX 都未結婚，做細的邊敢爬頭！」

但以錢鍾書的著作《圍城》中的金句來回應，應該可以更進一步連消帶打：「婚姻是一座圍城，城外的人想進去，城裡的人想出來。

4. 「 買咗樓上車未？300呎咁細？邊夠住？」

上車難在香港已非新鮮事，如果你照實說你買不起樓，也應該沒有人異議，建議你重溫TOPick文章〈蝸居呎價貴過豪宅 「窮人恩物」都絕望了？〉。

讓一早已經有樓在手，毋須為樓價或上車煩惱的親戚，瞭解香港樓市有幾癲。然後主題圍繞樓價，則如此結婚、生仔等問題便可以就此打住。未買樓就不結婚，這是「香港邏輯」吧？

至於「文青版」回覆，則學魯迅這句： 「貪安裡沒有自由，要自由就要經歷些危險，只有這兩條路。」姨媽姑姐聽唔明，不要緊，只要讓她們問不下去，就已達到目的。

5.「搵夠上岸未？」

雖然你唔明白，點解自已看來仍然後生壯年，白頭髮都無條，仍然會被人問「搵夠未？」「上岸未？」

但都是要答，林語堂這句話，啱用就照背啦，「享受悠閒的生活決不需要金錢，有錢的階級不會真正領略悠閒生活的樂趣。」

6.「開始返工了？搵幾錢一個月？」

原本說自己做什麼職業及月薪多少並非難堪事情，但怕親戚話你冇出息，又或者又與其他同輩比較。不妨「聲東撃西」：

「呀！我電話響，我聽個電話先！」

「呀！你食唔食生果？我去切！」

「呀！你食唔食年糕？我去煎！」

7. 「你讀嗰個學系，將來點搵到食？」

講到將來的事，未知數太多，與一年才見一次的親戚之間，實在毋須太認真與他們思辯將來的事。

要簡單結束這話題不容易，大可參考由一班年輕人在YouTube 頻道FHProduction上載的〈我在香港讀書的日子為題〉搞笑短片（可由1:18開始看），或許從中可找到可反守為攻的答案。

8. 「生小朋友未？讀邊間學校？考第幾？」

媽媽最怕被問到子女成績，自問不是虎媽的你，可以回覆一句：「求學不是求分數」，也可以將子女的功課難題備檔一份，即場請教「阿囝的功課，睇下你識唔識？」

9. 「幾時追多個？」

問得你幾時追多個，即是你已經有一名小孩，被親戚問到這條問題，而你又不想再生，亦不打算將自己的生育大計拿出來討論，不妨說一句：

生唔難，教先難！

隨即再對著正在搣盤桔的囝囝，學藝人吳鎮宇在中國綜藝節目《爸爸去哪兒2》中說的一句：

寶寶你過來，爸爸保證不打死你

適當地表達教仔的難處，識趣的親戚應不會再追問下去。

10.「為什麼咁靜， 點解問你咁多都唔答人呀？」

當你十問九不應，就避不到這第十個問題，都是嗰句，唯恐講多錯多，不如都是參考前人的智慧。

朱自清說：「沉默是一種處世哲學，用得好時，又是一種藝術。」

中國傳統最重視過新年，長輩親戚難得見面，多問是關心表現， 總要準備幾句標準答案， 長話短說，再加一句萬能key答案「講呢啲」，大家心照！又或者開枱麻雀，也不失為「轉台」好方法。若你有好答案，不妨留言分享！

最後，TOPick 仝人祝大家日日有話題！